قصه ميدوسا

 

إيه حكاية ترند ميدوسا دا 

تعالى الأول احكيلك  قصة ميدوسا ، ميدوسا في الميثولوجي الإغريقية كانت واحدة من ٣ بنات أخوات اسمهم الجورجون، ودول من شدة جمالهم كان اي حد يشوفهم لازم يقع في غرامهم وبالأخص ميدوسا إللي كانت تعتبر الملكة بتاعهم من شدة جمالها..

المهم إنه ال٣ بنات كانوا بيخدموا في أحد المعابد الخاصة بالإله أثينا منعزلين عن باقي البشر، وفي أحد الأيام اثناء مرور بوسيدون إله البحار بالمعبد، لمح ميدوسا وانبهر بجمالها الغير طبيعي وقرر إنه يقوم باغتtصابها بالقوة وبالفعل حصل وخلفت منه طفلين، بس تستنجد بمين والقاضي هو الجلاد والمُذنب! وخوفًا من بطش أثينا لو عرفت، سكتت ميدوسا وتكتمت ع الأمر.

بشكل ما مش موضوعنا، عرفت أثينا بإللي حصل ولامت ميدوسا عاللي عمله بوسيدون أله البحار بحجة إنها لو مكنتش جميلة جدًا، مكنتش اغرته يعمل فيها كده، وقررت أثينا تعاقبها في الشيء المميز فيها وهو جمالها، وقامت جايه منزله لعنتها ع الإخوات التلاتة مش ميدوسا بس، إنهم يتحولوا لوحش وجهه قبيح جدًا جدًا، جلدهم يتحول للون أخضر زي النحاس لما يأكسد، ونصفهم السفلي يتحول لثعبان، بالإضافة لإنه شعرها بردو يتحول لمجموعة ثعابين وأي حد يبص لوجههم دا إللي كان في يوم سر تميزهم، يتحول لحجر أو تمثال مكانه عشان مايقعش في حبهم حد تاني، وكزيادة للعقاب على ميدوسا، خلت اخواتها الأتنين خالدين للأبد، وهي الوحيدة إللي فانيه زي ماهي بعُمر البشر.

 باقي القصص والروايات بتنصفها لأنها ماذنبتش نهائي، بالعكس هي تم استغلالها لجمالها، وخافت تتكلم لأنها ضعيفة، وبردو هي اللي تم لومها على غلط بوسيدون أله البحار ، مش هو خالص، وبالرغم من علم اثينا إنه بوسيدون السبب، سابته وراحت عاقبت المجني عليها مش الجاني، وفي نهاية القصة بيتم تصويرها على إنها الشخص السيء في الحكاية كلها!

* ومن هنا اتاخدت قصتها عشان تعبر عن جانب خفي موجود حوالينا وهو حوادث 

التحرش، أو الاغتصاب إللي بتحصل من المقربين او غير المقربين  تجاه اطفالنا وبناتنا واولادنا ومحدش بيتكلم من الخوف.. 

 *** وبالرغم من معرفة الأم باللي بيحصل لبناتها، إلا إنها بتسكت وبتلوم البنت زي ما حصل مع ميدوسا بالظبط وهي إللي غلطانة 

#الحل:

1- أي حد تعرض لاعتداء تصدقوا وتقدموا الدعم  بالنصيحه وبالحمايه ،وتعلموا اطفالكم أن أى تعدى على الجسد مرفوض واى طفل اتعرض لكدا تروحوا بيه لمعالج نفسى ومش عيب 

2-البديل والأقوى عن معالج النفسى الأم ثم الأم ثم الأم تسيبك من النت والفون والشغل أوقات طويله  وتقعدى تحتوى بنتك وتتكلمى معاها وتقدميها ليها المشوره وتعرفي تفاصيل أكتر عن حياتها

3-ياريت المتخصصين فى علم النفس يكثفوا حملات توعية بمظاهر التحرش و كيفيه خلق علاقات سويه بين أفراد العيله وبين أصدقائهم في محيط المدرسه والنادي

  

--------- الشباب والبنات كلموا بابا وماما وازواجكم خليكم واثقين فيهم اوعوا حد يفقد الثقه دى بينكم اتمسكوا بالأسرة كويس جدا 

#نفسيتي #أخصائي_نفسي #حافظي_علي_نفسك #ميدوسا #medusa #medusatattoo #fypシ #لا_للتحرش